अमेरिकी राष्ट्रपतिलगायत विश्व नेताद्वारा दुःख व्यक्त

अन्तर्राष्ट्रिय

गृहपृष्ठ
अन्तर्राष्ट्रिय

अमेरिकी राष्ट्रपतिलगायत विश्व नेताद्वारा दुःख व्यक्त

सामाजिक सञ्चार मंगलबार, कात्तिक १५, २०७९

वासिङटन, १५ कात्तिक (रासस/एएनआई) :

भारतको पश्चिमी राज्य गुजरातको मोर्बीमा झोलुङ्गे पुल भत्किँदा भएको अकल्पनीय मानवीय क्षतिप्रति विश्व नेताहरूले गहिरो दुःख व्यक्त गरेका छन् ।

अमेरिकी राष्ट्रपति जो बाइडेन, रूसी राष्ट्रपति भ्लादिमिर पुटिन, नेपालका प्रधानमन्त्री शेरबहादुर देउवा, क्यानडाका प्रधानमन्त्री जस्टिन टुडो , जापानका प्रधानमन्त्री फुमियो किसिदा, पोल्याण्डका प्रधानमन्त्री मेटुझ मोरावियेकी, अमेरिकी विदेशमन्त्री एन्टोनी ब्लिङकेनर अष्ट्रेलियाका विदेशमन्त्री पेनी ओङले भारत सरकार, त्यहाँका जनताप्रति समवेदना व्यक्त गर्नुभएको हो । उक्त घटनाबाट आफूहरू स्तब्ध भएको बताउँदै उहाँहरूले दुर्घटनामा ज्यान गुमाएकाहरूका परिवारजनप्रति समवेदना व्यक्त गर्नुभएको छ । साथै उहाँहरू घाइतेहरूको शीघ्र स्वास्थ्यलाभको कामना पनि गर्नुभएको छ ।

आइतबार राति मच्छुनदीको झोलुङ्गे पुल भाँच्चिदा कम्तीमा एक सय ४१ जनाको मृत्यु भएको थियो भने एक सयभन्दा बढी हराइरहेका छन् । छट पर्व मनाउने क्रममा भीडले खचाखच मोरबीको पुल भाँच्चिएको थियो । दुर्घटनामा ज्यान गुमाएकामा अधिकांश महिला, बालबालिका र वृद्ध छन् । बेलाइतको शासनकालमा १९ औँ शताब्दीमा बनेको उक्त पुल मर्मतसम्भारपछि गत सातादेखि सञ्चालन गरिएको थियो ।

प्रधानमन्त्री नरेन्द्र मोदी आज घटनाबारे जानकारी लिन मोर्वी जाने कार्यक्रम छ । सोमबार सम्बद्ध अधिकारीसँग उहाँले उक्त घटनाका सम्बन्धमा छलफल एवम् समीक्षा गर्नुभएको छ । समीक्षा बैठकले दुर्घटनामा मारिएकाको सम्झनामा भोली राजकीय शोक मनाउने निर्णय गरेको छ ।

यसैबीच, पुल मर्मतको ठेक्का पाएको ओरेभा ग्रुप अजन्ता म्यानुफ्याक्छचरिङ प्राइभेट लिमिटेडका दुई जना प्रबन्धक, ठेकेदारलगायत नौ जना कर्तव्य ज्यान अभियोगमा पक्राउ परेका छन् ।

राष्ट्रसङ्घका महासचिव स्तब्ध

संयुक्त राष्ट्रसङ्घका महासचिव एन्टोनियो गुटरेसले भारतको पश्चिमी राज्य गुजरातमा झोलुङ्गे पुल भाच्चिँदा एक सय ४१ जनाको ज्यान गएको घटनाप्रति दुःख व्यक्त गर्नुभएको छ ।

सोमबार उहाँका प्रवक्ता स्टेफन डुजारिकले विज्ञप्ति प्रकाशन गरी सो कुराको जानकारी गराउनुभएको हो । सो दुर्घटनाबाट महासचवि गुटरेस निकै स्तब्ध भएको बताउनुभएको सो विज्ञप्तिमा जनाइएको छ ।

मानिसहरुले उक्त पुल हुँदै यात्रा गरिरहेका बेला पुल भाचिएको थियो । त्यसमा परेर एक सय ३० जनाको ज्यान गएको बताइएको छ ।

सोमबार भएको सो दुर्घटनामा परेर अरु पनि कैयौँ नागरिक घाइते भएका बताइएको छ । एक स्थानीय अधिकारीका अनुसार दुर्घटनामा ज्यान गुमाएकामा अधिकांश महिला, बालबालिका र वृद्ध छन् ।

महासचिव गुटरेसले सो दुर्घटनाबाट ज्यान गुमाएकाहरुप्रति हार्दिक श्रद्धाञ्जलि अर्पण गर्नुका साथै परिवारजनमा समवेदना व्यक्त गर्नुभएको छ ।

साथै महासचिव गुटरेसले यस दुर्घटनामा परी घाइते भएकाहरुलाई शीघ्र स्वास्थ्य लाभको कामना पनि गर्नुभएको छ ।

दीपावली पर्व मनाउने क्रममा भीडले खचाखच भएको मोरबीको उक्त पुल अकस्मात भाँच्चिएको थियो । बेलाइतको शासनकालमा १९ औँ शताब्दीमा बनेको उक्त पुल मर्मतसम्भारपछि गत सातादेखि सञ्चालन गरिएको थियो ।

उक्त पुल भाचिनाको कारणबारे राज्य सरकारका प्रहरी प्रमुखको नेतृत्वमा सोमबारदेखि नै अनुसन्धान थालिएको जानकारी दिइएको छ ।

सो पुलमा सयौँको सङ्ख्याका नागरिक परेको सूचनापछि हिजो राष्ट्रिय आपत् एवम् राहत बल, वायु सेना, नौसेना, राष्ट्रिय एवम् राज्यका सुरक्षा निकायका ठूलो सङ्ख्याका सुरक्षार्कीले खोज तथा उद्धार थालेका थिए ।

प्रकाशित मिति: मंगलबार, कात्तिक १५, २०७९ १६:३०

प्रतिक्रिया दिनुहोस्