नयाँ पुस्तालाई अवसर दिन मैले उम्मेदवारी नदिने निर्णय गरेँः नेतृ भुसाल

राजनीति

गृहपृष्ठ
राजनीति

नयाँ पुस्तालाई अवसर दिन मैले उम्मेदवारी नदिने निर्णय गरेँः नेतृ भुसाल

सामाजिक सञ्चार मंगलबार, वैशाख १३, २०७९

राजनीति भन्ने बित्तिकै हाम्रो मगजमा आउने प्रमुख शब्द नै पद हो । अर्थात हाम्रो सामाजिक चेतनामा राजनीति भनेको पद र प्रतिष्ठा कमाउन प्रयोग गरिने एक माध्ययमको रूपमा परिचित छ । त्यसैले त राजनीति गर्नेलाई पद भोगिको संज्ञा पनि दिएको पाइन्छ ।

निर्वाचनको बेला अनेकन प्रलोभन देखाउने र जितेपछि कोल्टे फर्कने नेताका कारण पनि हाम्रो समाजमा राजनीतिको इज्जत कम भएको या राजनीतिमा लागेकाहरु प्रति विश्वास कम भएको हो ।

तर, समाजमा कतिपय राजनीतिमा लागेका यस्ता पात्रहरु पनि छन् जसलाई पद, पैसा र प्रतिष्ठाले त्यति महत्व राख्दैन । जति जनताको समस्याको सारथी भएर आत्मासन्तुष्टी कमाउनुले महत्व राख्छ । यस्तै पात्रको एक प्रमुख उदाहरण हुन् पर्वतको विहादी गाउँपालिकाकी खगिसरा भुसाल ।

विद्यार्थी कालदेखि सक्रिय राजनीतिमा लागेर निरन्तर रुपमा जनताका साथमा रही जनताका समस्याको सारथी बनेकी उनी त्यस क्षेत्रकी सबैभन्दा लोकप्रिय तथा कुशल नेतृको रुपले परिचित छन् ।

करिब २० वर्ष महिला स्वास्थ्य स्वंयसेविका भएर स्थानीयको स्वास्थ्य तथा सामाजिक चेतानका लागि काम गरेकी उनको राजनीतिक यात्रा त्यति सहज भने थिएन ।

विसं २०४८ सालमा नेपाली कांग्रेसको भातृ संगठन नेविसंघमार्फत राजनीतिमा लागेकी उनको लागि राजनीति भनेको समाजसेवाको अर्को नाम हो । अर्थात उनको परिभाषामा राजनीति भनेको समाजसेवा हो । नेता भनेको जनताको सेवक हो ।

सामान्य परिवार, सामान्य आर्थिक अवस्था वैदेशिक रोजगारीमा लागेका श्रीमान् तथा घरमा साना तीन सन्तानलाई सम्हाल्दै उनले राजनीतिमा पनि संक्रिय रुपमा लागिन् । नेपाली कांग्रेमा आवद्ध भएर उनले महिला हिंसा, महिला सशक्तिकरण तथा महिला हक हितको लागि धेरै योगदान गरेकी छन् ।

यसैको मूल्यांकन गरेर पार्टीले उनलाई यसअघिको स्थानीय तहको निर्वाचनमा गाउँकार्यपालिका सदस्य बन्ने अवसर प्रदान गर्यो । पार्टीबाट टिकट पाएर प्रत्यक्ष रुपमा निर्वाचनमा लडेर उनी विजयी पनि भइन् ।
पाँच वर्षे कार्यकालमा जनताको प्रतिनिधि भएर जनताको लागि निरन्तर रुपमा लागेकी उनले यसपालिको निर्वाचनमा भने उम्मेदवारी नदिने निर्णय गरेकी छन् । नेतृत्व तहमा जहिल्यै एउटै अनुहार आउनाले पनि विकासले गति लिन नसक्ने आँकलन गर्दै उनले नयाँ पुस्तालाई अवसर दिनको लागि आफूले यसपालिका निर्वाचनमा उम्मेदवारी नदिएको घोषणा गरेकी हुन् ।

नयाँ पुस्तामा नयाँ भिजनका साथै नयाँ उर्जा हुने भएकाले पनि उनीहरुलाई अवसर दिनुपर्ने उनको धारणा छ । आफूले गर्न सक्ने काम जनताको लागि जनप्रतिनिधी नभए पनि गर्ने बताउँदै उनले स्थानीय तहमा उम्मेदवारी दिएका सबै नयाँ उम्मेदवारलाई हार्दिक बधाई तथा शुभकामना समेत व्यक्त गरेकी छन् ।

प्रकाशित मिति: मंगलबार, वैशाख १३, २०७९ २१:३४

प्रतिक्रिया दिनुहोस्