बक्स अफिसमा ‘लप्पनछप्पन २’को कमजोर व्यापार

समाचार

गृहपृष्ठ
समाचार

बक्स अफिसमा ‘लप्पनछप्पन २’को कमजोर व्यापार

विनय भुसाल बिहीबार, फागुन २६, २०७८

घरेलु बक्स अफिसमा पछिल्लो साता ‘म यस्तो गीत गाउँछु २’, ‘द ब्याटम्यान’ र ‘गंगुबाई काठियावाडी’ले सन्तोषजनक प्रदर्शन गरेका छन् । तर बिग बजेटको एक्सन फिल्म ‘लप्पनछप्पन २’ले बक्स अफिसमा कमजोर प्रदर्शन गरेको छ ।

गत शुक्रबार रिलिज भएको सौगात मल्ल, अनुपविक्रम शाही र शिव श्रेष्ठ स्टारर ‘लप्पनछप्पन २’ले अपेक्षाअनुसार व्यापार गर्न सकेन । मुख्य मल्टिप्लेक्स चेन क्यूएफएक्सले शुक्रबारदेखि नै मुकुन्द भट्टद्वारा निर्देशित फिल्मलाई हटाइदिएको छ ।

चार करोड रुपैयाँको लगानीमा निर्माण भएको मल्टिस्टारर ‘लप्पनछप्पन २’ले आफूलाई एक साता पनि टिकाउन मुस्किल रह्यो । ‘सोचेअनुसार दर्शक नआएपछि हामीले भोलिदेखि यसलाई हटाउने निर्णय लिएका छौं,’ क्यूएफएक्सको प्रणाली विभाग प्रमुख आदर्श सिग्देलले अनलाइनखबरसँग भने ।

सौगात मल्ल र अनुपविक्रम शाहीजस्ता स्टार भएपनि फिल्मले अपेक्षाकृत ओपनिङ चाहिं गर्न सकेन । समीक्षकले पनि फिल्मलाई लिएर कमजोरी औंल्याएका थिए । ‘लप्पनछप्पन २’ नचल्दा यसले कोरोना महामारीपछि लयमा फर्कन संघर्ष गरिरहेको नेपाली फिल्मलाई धक्का पुगेको कतिपय हल सञ्चालक बताउँछन् ।

‘लप्पनछप्पन २’को पहिलो साताको कलेक्सन ७५ लाख ग्रसमा सीमित हुनसक्ने प्रक्षेपण गरिएको छ ।

अन्य फिल्मको व्यापार कस्तो छ ?

‘म यस्तो गीत गाउँछु २’लाई दोस्रो साता (बुधबार बेलुकासम्म) क्यूएफएक्स चेनमा ३५ हजार ८५० जना दर्शकले हेरेका छन् । क्यूएफएक्सको तथ्यांकअनुसार दुई सातामा पल शाह र पूजा शर्मा स्टारर रोमान्टिक ड्रामाले उक्त चेनमा १ करोड ७५ लाख रुपैयाँ ग्रस कमाइ गरेको छ ।

निर्माताले पहिलो साता झन्डै ६ करोड कलेक्सन भएको दाबी गरेका थिए । ‘हाम्रो हलमा यो फिल्मको कमाइ निकै उत्साहजनक हो । हामीले सोचेभन्दा बढी कमाइ गरेको छ,’ सिग्देलले भने ।

सुदर्शन थापा निर्देशित फिल्मलाई काठमाडौको सिभिल मल, वान सिनेमाज्, बिग मुभिज, ललितपुरको लबिम मल र भक्तपुरको भाटभटेनीमा धेरैले हेरेका छन् । नेपालगञ्ज, नारायणगढ र पोखरामा पनि यो फिल्मले राम्रो कमाइ गरेको छ ।

बलिउड फिल्म ‘गंगुबाई काठियावाडी’ले दोस्रो सातासम्म घरेलु बक्स अफिसमा राहतपूर्ण कमाइ गरेको छ । यस्तै वार्नर ब्रोजको ‘द ब्याटम्यान’ले पहिलो साता ९० लाख ग्रस कमाइ गरेको एप्पल इन्टरटेनमेन्टले जनाएको छ ।

आगामी साता ‘द ब्याटम्यान’को शो स्थिर हुने देखिएको छ भने ‘म यस्तो गीत गाउँछु २’ र ‘गंगुबाई कठियावाडी’को शोमा भने कमी आउने हलहरुले सार्वजनिक गरेको तालिकामा देखिएको छ ।

टम हल्याण्ड स्टारर ‘अनचार्टेड’ पनि एक सातामै उत्रिएको थियो ।

प्रकाशित मिति: बिहीबार, फागुन २६, २०७८ ११:५२

प्रतिक्रिया दिनुहोस्