निजि विद्यालयको लागि चुनौति बन्यो ‘पाल्पाको रामतुलसी मावि’

शिक्षा

गृहपृष्ठ
शिक्षा

निजि विद्यालयको लागि चुनौति बन्यो ‘पाल्पाको रामतुलसी मावि’

अस्तित्व बिहीबार, फागुन १९, २०७८

रामतुलसी माध्यमिक विद्यालय

कुनै समय जीर्ण भवन, उदेकलाग्दो भौतिक संरचना, अनियमित शिक्षक/विद्यार्थी र कमजोर शैक्षिक अवस्था रहेको रामतुलसी माध्यमिक विद्यालय यतिबेला जिल्लाकै उत्कृष्ट नमुना सरकारी विद्यालय बनेको छ ।

लुम्बिनी प्रदेश अन्तर्गतको पाल्पाको पूर्वी भेगमा पर्ने रामपुर नगरपालिका–५ बेझाड बजारमा रहेको सो विद्यालय यतिबेला अत्याधुनिक प्रविधि, स्तरीय भौतिक पूर्वाधार, गुणस्तरीय शिक्षण सिकाइ र उत्कृष्ट नतिजाको पहिलो आकर्षणको केन्द्र हो ।

विसं २०२५ सालमा सामुदायिक सहयोगमा स्थापना भएको सो विद्यायले अनेकन अवरोधहरूको सामना गर्नुपर्‍यो । विसं २०६६ सालदेखि विद्यालयमा बाल विकास देखी कक्षा १२ सम्म अंग्रेजी तथा नेपाली दुवै भाषाको माध्यममा पढाइ सुरु गरियो । विद्यालयको शैक्षिक उन्नयन, प्रशासनिक, संरचनागत तथा शैक्षिक सबै किसिमको विकासको पहिलो श्रेय जान्छ विद्यालयका प्रधानाध्यापक बालकृष्ण लम्साललाई ।

No description available.

विद्यालयका प्रधानाध्यापकः बालकृष्ण लम्साल

जनआन्दोलन र बहुदलीय व्यवस्था पश्चात् जीर्ण अवस्थामा रहेको सो विद्यालयमा गणित विषयको शिक्षकको रुपमा आएका थिए प्रधानाध्यापक लम्साल । विगतका कुरा सम्झेर मुसुक्क हाँस्दै लम्साल भन्छन्,’म गणित विषयको शिक्षक हुँ। टिउसन पढाएर अलि अलि कमाउने सपना बोकेर यहाँ आएको थिएँ । तर प्रधानाध्यापक बन्न प्रेरणा पाएँ र अहिले विद्यालयको साख कमाएँ ।’

करिब २२ सय विद्यार्थीहरू रहेको सो विद्यालयमा निजितर्फबाट ६५ र बाँकी २७ जना गरी कुल ९२ जना शिक्षकहरूले अध्यापन गराउँछन् । विद्यालयमा कक्षा एक देखी दससम्म अंग्रेजी तथा नेपाली दुवै भाषामा पढाइ हुन्छ । यसका साथै विद्यालयमा तीन वर्षीय बाली विज्ञानको समेत पढाइ हुन्छ ।

आफूले लिएका हरेक निर्णयमा विद्यालयले साथ दिएकोले आफूमा काम गर्ने उर्जा आएको प्रधानाध्यापक लम्साल बताउँछन् । लम्साल भन्छन्,’मैले जे प्रस्ताव राखेँ, समुदायमा सबैले मलाई विश्वास गर्नुभयो । सुरुमा विद्यालयको पोसाकमा परिवर्तन लियौँ, सबैको सरसफाइमा ध्यान दियौँ, भौतिक संरचना हुँदै पढाइको गुणस्तरमा लाग्यौँ । र अंग्रेजी भाषामा पनि अध्यापन गर्न थाल्यौँ ।’

प्रविधि मैत्री अध्यापनलाई जोड दिएको सो विद्यालयमा चारैतर्फ खुल्ला वातावरण, खेल मैदान, मनोरम प्राकृतिक दृश्य पनि देख्न सकिन्छ । अनेकन मनोरञ्जनात्मक तथा अतिरिक्त क्रियाकलापको व्यवस्था रहेको सो विद्यालयमा विद्यार्थीहरू रचनात्मक ढङ्गले सिक्ने व्यस्था गरिएको छ । घोकन्ते विद्यामा लगाउने निजी विद्यालय भन्दा सो विद्यालयमा व्यवहारात्मक तथा रचनात्मक पढाइ हुने हुँदा अभिभावक पनि दङ्ग छन् । भने विद्यार्थीहरू पनि सिक्न पाउँदा उमङ्गीत छन् ।

No description available.

रमाउँदै अध्ययन गर्दै साना नानीहरु

विसं २०७४ सालमा नमुना विद्यालयको रुपमा घोषणा भएको सो विद्यालयका प्रधानाध्यापक शनिबार पनि विद्यालय जान्छन् । शनिबारको समेत तलब खाएको हुनाले आफूले बफादारीताका साथ आफ्नो कर्म पूरा गर्नुपर्ने उनले बताउछन् । उनी मात्र होइन उनी बाहेक विद्यालयका अरु शिक्षक पनि उस्तै मेहनत गर्छन् ।

यसरी, सरकारी विद्यालय भन्दा नाक खुम्चाउनेहरूको लागि गतिलो उदाहरण बन्यो रामतुलसी माध्यमिक विद्यालय । यतिबेला नतिजाको हिसाबले जिल्लाको तेस्रो नमुना विद्यालयमा घोषणा भएको सो विद्यालयलाई अब छिट्टै पहिलो विद्यालय बनाउने अभिप्राय रहेको विद्यालयका प्रधानाध्यापक लम्साल बताउँछन् ।

प्रकाशित मिति: बिहीबार, फागुन १९, २०७८ ०७:५६

प्रतिक्रिया दिनुहोस्