नुम्बुर हिमालको काखमा रहेको दुधपोखरी: उमाकुण्डको प्रकृतिको अनुपम उपहार

समाज

गृहपृष्ठ
समाज

नुम्बुर हिमालको काखमा रहेको दुधपोखरी: उमाकुण्डको प्रकृतिको अनुपम उपहार

सम्झना गौतम बिहीबार, चैत २१, २०८१

रामेछाप: रामेछाप जिल्ला बागमती प्रदेशमा अवस्थित एक अत्यन्तै सुन्दर र प्रकृतिले भरिपूर्ण जिल्ला हो। यस जिल्लाको उत्तरी भेगमा रहेको उमाकुण्ड गाउँपालिका, प्राकृतिक सुन्दरताले भरिपूर्ण क्षेत्र हो। यो गाउँपालिका आफैमा अत्यन्तै सुन्दर छ, प्राकृतिक स्वर्गको एक टुक्राको रूपमा लिइन्छ ।

यहाँका विभिन्न स्थलहरूको सौन्दर्य र विशिष्टता प्रत्येक आगन्तुकलाई मंत्रमुग्ध पार्न सक्छ। त्यसमध्ये एक आकर्षक स्थल हो दुधपोखरी, जुन नुम्बुर हिमालको काखमा रहेको छ। जसको उचाइ ६,९५८ मिटर रहेको छ। यस हिमालको काखमा रहेको दुधपोखरी एक अनुपम पर्यटकीय स्थल हो, जुन समुद्री सतहबाट ४,११० मिटरको उचाइमा रहेको छ।

दुधपोखरी एक हिमताल हो, जुन तीनतिर अग्ला पहाडहरूले घेरिएको छ। हिमशृङ्खलाबाट पग्लिएको हिउँको पानी तालमा जम्मा हुन्छ र तलतिरको पहाडबाट ओभरफ्लो हुँदै लिखु नदीको सुरुवात हुन्छ। यहाँको पानी स्वच्छ र शुद्ध छ, जसले यस स्थानलाई थप मनमोहक बनाएको छ।

यो स्थल केवल एक प्राकृतिक सम्पदा मात्रै हैन एक पवित्र स्थल पनि हो।

यहाँको शान्त वातावरण र अलौकिक सौन्दर्यले पर्यटकलाई अज्ञात सुख र शान्तिको अनुभव गराउँछ।

दुधपोखरीको यात्राले एक अविस्मरणीय अनुभव प्रदान गर्छ। यहाँको प्राकृतिक सौन्दर्य, स्वच्छ वातावरण, र धार्मिक महत्त्वले यो स्थानलाई नेपाली तथा विदेशी पर्यटकहरूका लागि विशेष गन्तव्य बनाएको छ। यहाँ पदयात्रा गर्नेहरूलाई शान्त वातावरण, हिमशृङ्खलाको नजिकको दृश्य, तथा प्राकृतिक रमणीयताको अपूर्व अनुभव प्राप्त हुन्छ।

दुधपोखरी नेपालको प्राकृतिक तथा सांस्कृतिक सम्पदाको महत्वपूर्ण हिस्सा हो। यसको संरक्षण र प्रवर्द्धनले समग्र क्षेत्रको विकासलाई टेवा पुर्याउनेछ, जसले भविष्यमा दुधपोखरीलाई अझ लोकप्रिय पर्यटकीय गन्तव्यको रूपमा स्थापित गर्नेछ।

दुधपोखरीको प्रवर्द्धनले समग्र उमाकुण्ड गाउँपालिकाको आर्थिक तथा पर्यटन विकास र समृद्धिमा योगदान पुर्याउनेछ, जसले यस क्षेत्रलाई एक प्रमुख पर्यटकीय स्थलको रूपमा स्थापित गर्न मद्दत पुर्याउनेछ ।