पाटनका स्वास्थ्य संस्थामा प्रजनन स्वास्थ्यसम्बन्धी शिविर सञ्चालन

स्वास्थ्य

गृहपृष्ठ
स्वास्थ्य

पाटनका स्वास्थ्य संस्थामा प्रजनन स्वास्थ्यसम्बन्धी शिविर सञ्चालन

सामाजिक सञ्चार आइतबार, चैत १७, २०८१

राष्ट्रिय समाचार समिति
बैतडी, १७ चैत

जिल्लाको पाटन नगरपालिकाका तीनवटा स्वास्थ्य संस्थामा प्रजनन स्वास्थ्य शिविर आयोजना गरिने भएको छ। पाटन प्राथमिक स्वास्थ्य केन्द्र, वसन्तपुर स्वास्थ्य चौकी र सिद्धेश्वर स्वास्थ्य चौकी खोडपेमा महिलाका लागि निःशुल्क प्रजनन स्वास्थ्य शिविर सञ्चालन गरिने भएको हो।

नगरपालिकाका स्वास्थ्य शाखा प्रमुख मदनसिंह महराले नेपाल मेड जर्मनी तथा नगरको सहकार्यमा महिलाहरूका लागि तीनवटै स्वास्थ्य संस्थामा निःशुल्क शिविर सञ्चालन हुने जानकारी दिनुभयो। उहाँका अनुसार पाटन–६ को प्राथमिक स्वास्थ्य केन्द्रमा यही चैत २२ गते, पाटन–८ को सिद्धेश्वर चौकीमा २३ गते र पाटन–५ को वसन्तपुर स्वास्थ्य चौकीमा २४ गते निःशुल्क प्रजनन स्वास्थ्य शिविर सञ्चालन हुनेछ।

प्रजनन स्वास्थ्यसँग सम्बन्धित समस्या, गर्भ नरहने वा पटकपटक तुहिने, महिनावारी हुँदा पेट दुख्ने वा धेरैपटक रगत बहने, पिसाब गर्दा दुख्ने वा पोल्नेलगायत रोगको जाँच, उपचार तथा परामर्श प्रदान गरिने सिद्धेश्वर स्वास्थ्य चौकीका सिनियर अहेब जयराज भट्टले जानकारी दिनुभयो। उहाँका अनुसार पाठेघरको मुखको क्यान्सरसम्बन्धी जाँच पनि गरिने छ। स्त्री तथा प्रसूति रोग विशेषज्ञ डा निता तिमिल्सिना र रेजिना खड्काले सेवा दिने उहाँको भनाइ छ।

प्रकाशित मिति: आइतबार, चैत १७, २०८१ १६:४३

प्रतिक्रिया दिनुहोस्