बागमती प्रदेश समन्वय परिषद् बैठक : विभिन्न कार्यपत्र प्रस्तुत

समाचार

गृहपृष्ठ
समाचार

बागमती प्रदेश समन्वय परिषद् बैठक : विभिन्न कार्यपत्र प्रस्तुत

सामाजिक सञ्चार शुक्रबार, माघ ४, २०८१

हेटौँडा, ४ माघ

बागमती प्रदेश समन्वय परिषद्को पाँचौँ बैठक हेटौँडामा जारी छ । सङ्घ, प्रदेश र स्थानीय तह ऐन, २०७७ को दफा २४ (१) को व्यवस्थाअनुसार बिहीबारदेखि परिषद् बैठक आयोजना गरिएको हो ।

मुख्यमन्त्री बहादुरसिंह लामाको अध्यक्षतामा बैठक बसेको हो । बैठकमा प्रदेश सरकारका मन्त्रीहरु, स्थानीय जनप्रतिनिधि, जिल्ला समन्वय समितिका प्रमुख ललित घलानलगायतको उपस्थिति रहेको छ । बिहीबार बसेको पहिलो दिनको बैठकमा तीनवटा कार्यपत्र प्रस्तुत गरिएका थिए । मुख्यमन्त्री तथा मन्त्रिपरिषद् कार्यालयका सचिव वेदप्रसाद भण्डारीले प्रदेश तथा स्थानीय तहका कर्मचारी व्यवस्थापन, आन्तरिक मामिला तथा कानुन मन्त्रालयका सचिव पूर्णबहादुर दर्जीले ‘विपद् व्यवस्थापन र यसका चुनौती र आर्थिक मामिला तथा योजना मन्त्रालयका सचिव कृष्ण मैनालीले अन्तरसरकारी वित्तीय हस्तान्तरण र राजस्व बाँडफाँट’ विषयक कार्यपत्र प्रस्तुत गर्नुभएको थियो ।

कार्यपत्र माथिको छलफलमा बोल्नुहुँदै गाउँपालिका महासङ्घ बागमती प्रदेशका अध्यक्ष कर्णबहादुर मगरले प्रदेश लोकसेवा आयोग र सुशासन केन्द्रलाई क्रियाशील बनाउन सरकारको ध्यानाकर्षण गराउनुभयो। त्यसैगरी, रसुवाको उत्तरगया गाउँपालिकाका उपाध्यक्ष चमेली गुरुङले जनप्रतिनिधिका लागि क्षमता अभिवृद्धि गर्ने तालिमहरु सञ्चालन गर्नुपर्नेमा जोड दिनुभयो।

त्यसैगरी, छलफलमा जिल्ला समन्वय समिति काभ्रेपलाञ्चोकका प्रमुख दीपकप्रसाद गौतमले डोजरे विकासलाई निरुत्साहित गर्नुपर्ने बताउनुभयो। आन्तरिक स्रोतका नाममा प्रकृतिको दोहन गर्ने काम भइरहेकामा उहाँले चिन्ता व्यक्त गर्नुभयो। रामेछाप नगरपालिकाका प्रमुख लवश्री न्यौपानेले दीर्घकालीन रुपमै भौतिक संरचना निर्माणमा देखिएका समस्यालाई समाधान गर्नुपर्नेमा जोड दिनुभयो ।

आजको बैठकमा ‘बागमती प्रदेशको दोस्रो आवधिक योजना, प्रदेश आयोजना बैङ्क सञ्चालन र प्रादेशिक औद्योगिक व्यापार ऐनको कार्यान्वयनको अवस्था’ विषयक कार्यपत्र प्रस्तुत गरिने बताइएको छ । तीनै तहका सरकारबीच अधिकार बाँडफाँट, विकास निर्माण, कानुन निर्माणमा समन्वय एवं सहकार्य तथा उत्पन्न विवाद संवादबाट समाधान गर्न सहजीकरण गर्न परिषद्को बैठक बस्दै आएको छ । रासस

प्रकाशित मिति: शुक्रबार, माघ ४, २०८१ १६:३७

प्रतिक्रिया दिनुहोस्