आज प्रधानमन्त्रीमा नियुक्त हुँदै ओली, शपथ भने भोलि हुने

राजनीति

गृहपृष्ठ
राजनीति

आज प्रधानमन्त्रीमा नियुक्त हुँदै ओली, शपथ भने भोलि हुने

सामाजिक सञ्चार आइतबार, असार ३०, २०८१

नेकपा एमालेका अध्यक्ष केपी शर्मा ओली । फाइल तस्बिर ।

काठमाडौँ । नेकपा एमालेका अध्यक्ष केपी शर्मा ओली आज प्रधानमन्त्री नियुक्त हुँदैछन् । नेपाली कांग्रेससहितको समर्थनमा नयाँ सरकार गठनको दाबी पेस गरेका ओलीलाई राष्ट्रपति रामचन्द्र पौडेलले आज नियुक्त गर्ने तयारी गरेका छन् ।

संविधानको धारा ७६ (२) नेपाली कांग्रेसका संसदीय दलका नेता शेरबहादुर देउवाको समर्थन लिएर शुक्रबार साँझ ओलीले नयाँ सरकार गठनको दाबी पेस गरेका थिए ।

राष्ट्रपतिले आइतबार साँझ ५ बजेसम्मका लागि समयसीमा दिएर सरकार गठनको आह्वान गरेका छन् । आज ओलीलाई प्रधानमन्त्री नियुक्त गरेर सोमबार बिहान ११ बजे आसपासको समयमा शपथ ग्रहण कार्यक्रम राख्ने तयारी राष्ट्रपति कार्यालयको छ ।

नियुक्त गरेर आइतबार नै शपथ ग्रहणका लागि निम्तो दिन नभ्याउने भएपछि सोमबारका लागि राष्ट्रपति कार्यालयले शपथको तयारी गरेको हो ।

ओलीले भने आफू नियुक्त हुनेबित्तिकै कांग्रेस र एमालेका भागमा परेका सबै मन्त्रीलााई सोमबार नै शपथ ग्रहण गराउनेगरी तयारी थालेका छन् ।

यी दुवै दलले मन्त्रालय र मन्त्रीको संख्या टुंग्याउन तीव्र छलफल गरिरहेका छन् । शनिबार दिउँसो देउवाले पार्टी कार्यसम्पादन समितिको बैठक नै राखेर मन्त्रीहरूको बारेमा छलफल गरेका थिए ।

ओली यससँगै चौथो पटक मुलुकको प्रधानमन्त्री बन्न लागेका हुन् । उनी यसअघि ओली पहिलोपटक २०७२ साल असोज २५ गते मुलुकको प्रधानमन्त्री बनेका थिए । त्यसपछि ओली २०७४ फागुन ३ गते दोस्रोपटक प्रधानमन्त्री बनेका थिए । त्यसपछि उनी २०७८ सालमा तेस्रो पटक मुलुकको प्रधानमन्त्री बनेका थिए ।

यही असार १७ गते मध्यरातमा प्रमुख राजनीतिक दल कांग्रेससँग सत्ता साझेदारीको सहमति भएपछि ओलीले नेकपा माओवादी केन्द्रसँगको गठबन्धन तोडेका थिए । कांग्रेससँग आलोपालो सरकार चलाउने सहमति भए अनुसार सुरुमा ओली प्रधानमन्त्री बन्न लागेका हुन् ।

ओलीको करिब दुई वर्षको कार्यकालपछि कांग्रेसका सभापति देउवा मुलुकको प्रधानमन्त्री बन्नेछन् ।

प्रकाशित मिति: आइतबार, असार ३०, २०८१ ०८:३३

प्रतिक्रिया दिनुहोस्