संघीय संसदअन्तर्गत दुवै सदनको बैठक बस्दै, के छन् एजेन्डा?

राजनीति

गृहपृष्ठ
राजनीति

संघीय संसदअन्तर्गत दुवै सदनको बैठक बस्दै, के छन् एजेन्डा?

सामाजिक सञ्चार सोमबार, चैत ५, २०८०

काठमाडौँ । संघीय संसदअन्तर्गत साेमबार दुवै सदनको बैठक बस्दैछ । जसअनुसार प्रतिनिधिसभाको बैठक आज बिहान ११ बजे बस्दैछ ।

आइतबारको प्रतिनिधिसभाको बैठक शोकप्रस्ताव पारित गरेर स्थगित भएको थियाे । प्रतिनिधिसभाकी सांसद मञ्जु शर्मा अन्सारीको निधनमा शोक प्रस्ताव पारित गरेर बैठक स्थगित भएकाे हाे ।

त्यसअघिको बैठकमा गृहमन्त्री रवि लामिछानेको सहकारी प्रकरणबारे प्रश्न उठाउँदै कांग्रेसका सांसद्ले संसद् अवरोध गरेका थिए ।

संसद सचिवालयका अनुसार आजकाे बैठकमा ऊर्जा, जलस्रोत तथा सिँचाइमन्त्री शक्तिबहादुर बस्नेतले अन्तर्राष्ट्रिय सौर्य गठबन्धन (आई एस ए) को स्थापनासँग सम्बन्धित सम्झौता पेस गर्ने, माननीय उपप्रधानमन्त्री एवं परराष्ट्रमन्त्री नारायणकाजी श्रेष्ठले विमस्टेक वडापत्रमाथि सामान्य छलफल गरियोस् भन्ने प्रस्ताव प्रस्तुत गर्ने कार्यसूची रहेकाे छ ।

यस्तै, कानुन, न्याय तथा संसदीय मामिलामन्त्री पदम गिरीले सम्पत्ति शुद्धीकरण (मनि लाउण्डरिङ) निवारण तथा व्यावसायिक वातावरण प्रवर्द्धनसम्बन्धी केही नेपाल ऐनलाई संशोधन गर्ने विधेयक, २०८० माथि राष्ट्रिय सभाबाट भएको संशोधनमाथि विचार गरियोस् भन्ने प्रस्ताव प्रस्तुत गर्ने, आ.व. २०८१/०८२ को लागि विनियोजन विधेयकका सिद्धान्त र प्राथमिकता सम्बन्धमा (कर प्रस्ताव बाहेक) माथि छलफल जारी रहने कार्यसूची रहेको छ ।

यसैगरी, राष्ट्रियसभाको बैठक आज दिउँसो सवा १ बजे बस्दैछ । बैठकमा अध्यक्ष नारायणप्रसाद दाहालले प्रतिनिधि सभा सदस्य मञ्जु शर्मा अन्सारीको निधनमा शोक प्रस्ताव प्रस्तुत गर्ने कार्यसूची रहेको छ ।

साथै कार्यव्यवस्था परामर्श समितिमा सदस्य मनोनयन, अनुगमन तथा मुल्याङ्कन विधेयक, २०७६ माथि छलफल र निर्णयार्थ प्रस्तुत, विनियोजन विधेयकका सिद्धान्त र प्राथमिकतामाथि छलफल, विनियोजन विधेयकका सिद्धान्त र प्राथमिकताका सम्बन्धमा अर्थ मन्त्रीबाट जवाफ दिने कार्यसूची रहेको छ ।

प्रकाशित मिति: सोमबार, चैत ५, २०८० १०:०२

प्रतिक्रिया दिनुहोस्