सिकाइ उपलब्धि वृद्धि गर्न उपचारात्मक कक्षा

शिक्षा

गृहपृष्ठ
शिक्षा

सिकाइ उपलब्धि वृद्धि गर्न उपचारात्मक कक्षा

सामाजिक सञ्चार बुधबार, पुस १३, २०७९

कावासोती, १३ पुस (रासस) :

सामुदायिक विद्यालयमा पाठयक्रमले तोकेको सिकाइ उपलब्धि कम भएको भन्दै कावासोती नगरपालिकाभित्रका सबै सामुदायिक विद्यालयले सिकाइ उपलब्धि वृद्धि गर्न उपचारात्मक कक्षा सुरु गरेका छन् ।

चालु शैक्षिक सत्रलाई सिकाइ उपलब्धि वृद्धि वर्षकोरुपमा अगाडि बढाएको कावासोती नगरपालिकाको शिक्षा शाखाले नगरभित्रका सबै सामुदायिक विद्यालयमा अनिवार्यरुपमा उपचारात्मक कक्षा सञ्चालन गर्न अनिवार्य गराएको नगर शिक्षा शाखाका अधिकृत राजन पाण्डेले जानकारी दिनुभयो ।

कक्षा कोठामा शिक्षकले आधार परीक्षा लिएर विद्यार्थीको स्तर पत्ता लगाई कमजोर, मध्यम र उत्तम गरी तीन समूहमा विभाजन गरेर कक्षा सञ्चालन गर्ने गरिएको अधिकृत पाण्डे बताउनुहुन्छ । कमजोर विद्यार्थीलाई बिहान ०९ देखि १० बजेसम्म र साँझ ४ देखि ५ बजेसम्म सम्बन्धित विषय शिक्षकले विद्यार्थीको आवश्यकताअनुसार शिक्षण गर्न विगत एक महिनादेखि सुरु गरिएको छ । आधार परीक्षामा राम्रा देखिएका विद्यार्थीलाई उनीहरुको सिकाइस्तर घटन नदिने गरी कक्षा कोठामानै शिक्षण गरिएको पाण्डेले बताउनुभयो ।

वार्षीक परीक्षामा विद्यार्थीको राम्रो नतिजा ल्याउने उद्देश्यका साथ तत्कालका लागि दुई महिना कक्षा सञ्चालन गरिएको र यसको प्रभावकारीता हेरेर आगामी शैक्षिक सत्रसमेतमा सञ्चालन गर्ने योजना रहेको उहाँको भनाइ छ ।

पाठ्यक्रमले तोकेको सिकाइ उपलब्धि पुरा गर्न अधिकांश विद्यार्थीले नसकेपछि नगरपालिकाले चालु शैक्षिक सत्रलाई सिकाइ उपलब्धि वर्षका रुपमा अगाडि बढाएको हो । अहिले सञ्चालन गरिएको उपचारात्मक कक्षाले सिकाइ उपलब्धि वृद्धि हुने पाण्डेले विश्वास व्यक्त गर्नुभयो । सामुदायिक विद्यालयमा मात्रै सञ्चालन भएका उपचारात्मक कक्षा संस्थागत विद्यालयसमेतमा सञ्चालन गर्न आग्रह गरिएको पाण्डेले बताउनुभयो ।

विद्यालयमा शिक्षकले निःशुल्करुपमा कक्षा सञ्चालन गरेपछि अभिभावक पनि खुसी भएका छन् । घरमा विद्यार्थीलाई सिकाउन आफुसमेतलाई गाह्रो भएको अवस्थामा विद्यालयमै शिक्षकले निःशुल्करुपमा कक्षा सञ्चालन गरिदिँदा खुसी लागेको कावासोती ११ की सीता रिजालले बताउनुभयो । “घरमा अभिभावकलाई नटेर्ने, अङ्ग्रेजी गणितजस्ता अप्ठ्यारा विषय सिकाउन गाह्रो थियो, बिहान बेलुका विद्यालयमै पढछन्, बाबु नानीलाई पनि व्यस्त बनाएको छ”, उहाँले भन्नुभयो ।

नगरपालिकाले उपचारात्मक कक्षा सञ्चालन गर्न अनिवार्य गरेपछि विगत एक महिनादेखि कावासोती नगरपालिकाका सामुदयिक विद्यालयका शिक्षक र विद्यार्थी पाठ्यक्रमले तोकेको सिकाइ उपलब्धि पुरा गर्न बिहानै ९ देखि साँझ ५ बजेसम्म विद्यालयमै रहने गरेका छन् । निःशुल्करुपमा कक्षा सञ्चालन गरिएको भए पनि सिकाइ उपलब्धि वृद्धि अभियानमा शिक्षकको सहयोग राम्रो रहने गरेको अधिकृत पाण्डेले बताउनुभयो ।---

प्रकाशित मिति: बुधबार, पुस १३, २०७९ १३:५६

प्रतिक्रिया दिनुहोस्