आचारसंहिता उल्लङ्घनको विषयमा छलफल

निर्वाचन-२०७९

गृहपृष्ठ
निर्वाचन-२०७९

आचारसंहिता उल्लङ्घनको विषयमा छलफल

सामाजिक सञ्चार मंगलबार, कात्तिक २९, २०७९

बेलहिया (रुपन्देही), २९ कात्तिक (रासस):

जिल्लामा निर्वाचन प्रचारका क्रममा दलहरुबाट निर्वाचन आचारसंहिता उल्लङ्घन भएकोप्रति इन्सेकले रुपन्देहीका प्रशासनिक निकायका अधिकारीलाई सचेत गराएको छ ।

रुपन्देहीमा भइरहेको निर्वाचन आचारसंहिता उल्लङ्घनको विषयमा मानवअधिकारवादी संस्था इन्सेकका प्रतिनिधिले जिल्लास्थित सुरक्षा निकायका प्रमुखहरुसँगको छलफलमा निर्वाचनलाई स्वच्छ, निष्पक्ष र धाँधलीरहित बनाउन आचारसंहिता उल्लङ्घनको विषयलाई गम्भीरतापूर्वक लिनुपर्ने सुझाव दिएका छन् ।

इन्सेक कार्यसमिति सदस्य शोभाखर बुढाथोकीसहितको टिमले जिल्ला प्रशासन कार्यालय भैरहवामा गरेको छलफलमा आचारसंहिता उल्लङ्घनलाई सामान्य रुपमा नलिन पनि आग्रह गर्नुभयो ।

छलफलमा इन्सेक लुम्बिनी प्रदेश संयोजक भोला महतले अन्य जिल्लाको तुलनामा रुपन्देहीमा निर्वाचनका लागि सुरक्षा तयारी राम्रो भएको बताउनुभयो । इन्सेकका पर्यवेक्षक सदस्य शिवप्रसाद गौडेलले रुपन्देहीमा चकलेटमा चुनाव चिह्न राखेर बाडेको, लाउड स्पिकर र ठूलाठूला पोस्टर टाँस्ने गरको भन्दै त्यसतर्फ प्रशासनले तत्काल कदम चाल्नुपर्ने सुझाव दिनुभयो । ।

छलफलमा यौनिक तथा लैङ्गिक अल्पसङ्ख्यक मतादाताका लागि प्रशासनिक तवरबाट के कस्तो व्यवस्थापन भएको छ भनी आनिक रानाले चासो व्यक्त गर्नुभयो । इन्सेका जिल्ला प्रतिनिधि रिमा बिसी, गैससको केन्द्रीय सदस्य गोबिन्द रेग्मी लगायतले रुपन्देही जिल्लामा निर्वाचन प्रचारप्रसारका क्रममा दलहरुले आचारसंहिता उल्लङ्घन गरेको भन्दै त्यसतर्फ प्रशासनको ध्यानकर्षण गराउनु भएको थियो ।

छलफलमा प्रमुख जिल्ला अधिकारी भरतमणि पाण्डेले प्रशासनिक तवरबाट आचारसंहिता उल्लङ्घन गर्नेलाई कारबाही गर्न कुनै कमी नराखिने बताउनुभयो । उहाँले जिल्लामा सात सय सात मतदान केन्द्रमा आठ हजार कर्मचारी, चार हजार आठ सय ३० नेपाल प्रहरी, आठ सय ८८ सशस्त्र प्रहरी, २९ जना अनुसन्धानका कर्मचारी र आवश्यक्ता अनुसार नेपाली सेना परिचालन गरी पूर्वतयारी गरिरहको बताउनुभयो । उहाँले सीमा क्षेत्रमा मङ्सिर १ गते राति १२ देखि ४ गते राति १२ बजेसम्म बन्द रहने पनि जानकारी दिनुभयो ।
–––

प्रकाशित मिति: मंगलबार, कात्तिक २९, २०७९ १३:५१

प्रतिक्रिया दिनुहोस्