ट्रस प्रविधिको झोलुङ्गे पुल निर्माण

भौतिक पुर्वाधार

गृहपृष्ठ
भौतिक पुर्वाधार

ट्रस प्रविधिको झोलुङ्गे पुल निर्माण

सामाजिक सञ्चार शुक्रबार, पुस १६, २०७८

म्याग्दी, १६ पुस (सामाजिक सञ्चार): म्याग्दीको धौलागिरि गाउँपालिका–६ मराङको अस्कारेखोलामा निर्माण भएको ट्रस प्रविधिको झोलुङ्गे पुलबाट तीन वडाका ७०० घरधुरी लाभान्वित भएका छन् । धौलागिरि गाउँपालिकाको सहयोग र उपभोक्ताको श्रमदान गरी कूल रु ३० लाख ५० हजारको लागतमा ३५ मिटर लामो पुल निर्माण भएको हो ।

टिबिएसयुको प्राविधिक र गैरसरकारी संस्था मिलन म्याग्दीको प्राविधिक सहयोगमा निर्माण भएको सो पुलबाट धौलागिरिको मल्कवाङ, मराङ, आरवाङ, हाङवाङ, औसीवाङ, भेडीखाल्टा र रघुगङ्गाको कुइनेका ७०० घरधुरी लाभान्वित भएका उपभोक्ता समितिका अध्यक्ष जित गर्बुजाले जानकारी दिनुभयो ।

पुलको बिहीबार धौलागिरि गाउँपालिकाका अध्यक्ष थमसरा पुनले शुभारम्भ गर्दै भन्नुभयो, “स्थानीयवासीलाई सुरक्षितरूपमा आवतजावत गर्न पुलले सुविधा पुगेको छ । गत वर्ष सुरु भएका सातमध्ये सबैभन्दा पहिले आस्कारे खोला पुल निर्माण सकिएको हो ।”

यसैगरी धौलागिरि–७ धारापानीमा रहेको किसानी माविलाई बिहीबार सात थान कम्प्युटर हस्तान्तरण गरिएको छ । सङ्गम म्याग्दीका अध्यक्ष दीपक पौडेल र प्रशासन तथा वित्त प्रमुख सुमी जिसीले विद्यालयका प्रअ धु्रव भण्डारी र शिक्षक अभिभावक सङ्घका अध्यक्ष रामबहादुर खत्रीलाई ती सामग्री हस्तान्तरण गर्नुभएको हो ।

गुड नेवर्स इन्टरनेशनल नेपालको आर्थिक तथा प्राविधिक सहयोगमा धौलागिरि गाउँपालिकाको समन्वय र सङ्गम म्याग्दीको सहजीकरणमा सञ्चालित होप विद्यालय परियोजनाअन्तर्गत कम्प्युटर उपलब्ध गराइएको सङ्गमका अध्यक्ष पौडेलले बताउनुभयो ।

पहिराबाट क्षतिग्रस्त भवन स्थानान्तरणका लागि परियोजनाको रु ८० लाख सहयोगमा किसानी माविको धारापानीमा चारकोठे भवन निर्माणाधीन छ । प्रतिगोटा रु ६९ हजारका दरले कूल रु चार लाख ८३ हजार मूल्य बराबरको सात थान कम्प्युटर उपलब्ध गराएको उहाँले बताउनुभयो ।

प्रकाशित मिति: शुक्रबार, पुस १६, २०७८ ११:३४

प्रतिक्रिया दिनुहोस्