वडा कार्यालय भवनको शिलान्यास

भौतिक पुर्वाधार

गृहपृष्ठ
भौतिक पुर्वाधार

वडा कार्यालय भवनको शिलान्यास

सामाजिक सञ्चार बुधबार, मंसिर २९, २०७८

गण्डकी, २९ मङ्सिर (सामाजिक सञ्चार): पोखरा महानगरपालिका–८ स्थित न्यूरोडमा वडा कार्यालय भवन निर्माण गरिने भएको छ । महानगरका कार्यवाहक प्रमुख मञ्जुदेवी गुरुङले सो भवनको आज शिलान्यास गर्दै महानगरले पूर्वाधार विकासलाई प्राथमिकतामा दिएको बताउनुभयो ।

कूल चौध आना जग्गामा भूमिगत पार्किङ, लिप्mटसहित ६ आनामा पाँच तल्ले सुविधा सम्पन्न कार्यालय र बाँकी जग्गामा बगैँचा अन्य आवश्यक संरचना निर्माण हुने सो भवनको लागत रु दुई करोड ९७ लाख रहेको इञ्जिनीयर नरेन्द्र बस्यालले जानकारी दिनुभयो ।

नगरपालिकाका ३३ वडामध्ये आठ नयाँ भवन निर्माण गरिनुका साथै ११ वटा कार्यालयको स्तरोन्नति गरिएको छ भने अन्य निर्माणाधीन अवस्थामा र पाँच वटाको जग्गा प्राप्तिको लागि पहल भइरहेको जनाइएको छ ।

महानगर प्रवक्ता धनबहादुर नेपालीले महानगरका बासिन्दालाई प्रविविमैत्री सेवा प्रवाहमा नवनिर्मित सुविधान सम्पन्न भवन कोषेढुङ्गा सावित हुने विश्वास व्यक्त गर्नुभयो ।

वडा नं ८ का वडाध्यक्ष रुद्र बरालका अध्यक्षतामा भएको कार्यक्रममा पोखरा ३ का वडाध्यक्ष रवीन्द्र प्रजु, प्रमुख प्रशासकीय बलराम रिज्याल, वडासदस्य कृष्णमान ठुसाजु, निर्माण कम्पनीका खेम तिमिल्सिना, वडासचिव सविता ढुङ्गानालगायतले तोकिएका समयमा विकास निर्माण सम्पन्न हुनुपर्नेमा जोड दिनुभएको थियो ।

पोखराकै मुख्य सडकमा वडा कार्यालय भवन निर्माणसँगै सेवाग्राहीको सुरक्षा र सुविधाका लागि तत्काल आकाशे पुल निर्माणमासमेत ध्यान दिनुपर्ने वडावासीको माग छ ।

प्रकाशित मिति: बुधबार, मंसिर २९, २०७८ १३:२१

प्रतिक्रिया दिनुहोस्